Fordelar med turkart framføre Norge 1 : 50 000 (M711-serien)

Alternativet til turkart er Statens kartverk sin hovudkartserie Norge 1 : 50 000 (M711-serien). Fordelen med turkart framføre denne kartserien er:

Større område
Eit turkart dekker eit større område. Papirformatet kan vere opp til 100 x 70 cm (dei kan lagast større, men då blir trykkekostnaden stor). Trekker vi i frå marg og det som går med til tittel og teiknforklaring, vil eit turkart i målestokk 1 : 50 000 dekke eit område på omlag 1500 km². Til samanlikning dekker eit kartblad i Norge 1 : 50 000-serien frå 548 til 723 km². Turgåarane kan derfor i mange høve klare seg med eitt kart, i staden for fleire kartblad frå Norge 1 : 50 000-serien. Eitt stort kartblad gjev også betre oversikt, og gjer orientering med kart og kompass enklare (har du prøvd å ta ut kompasskurs til eit punkt på nabokartbladet medan det bles kuling?).

Fritt valgt område
Eit turkart kan dekke eit fritt valgt område, som blir bestemt av oppdragsgjevar. Kartblada i Norge 1 : 50 000 har ei fast inndeling. Kvart kartblad er 23 - 36 lengdeminutt i aust-vest retning (20 - 26 km), og 15 breiddeminutt (23 km) i nord-sør retning. Det er slett ikkje alltid denne inndelinga stemmer med det som er eit naturleg turområde.

Betre stinett
Stinettet som er i kartserien Norge 1 : 50 000 er ikkje fullstendig. Det finst mange stiar rundt om kring i landet som ikkje er med på desse karta. På eit turkart kan alle stiane i det aktuelle området takast med, eventuelt med ei oppdatert symbolbruk som merka eller umerka sti.

Fleire tema
Følgjande ”turkarttema” er ikkje med i Norge 1 : 50 000-serien:

• Preparert skiløype

• Lysløype

• Merka skiløype

• Umerka skiløype

• Merka rute (rute = ”sti” som ikkje synest i terrenget,
  over blokkmark, svaberg, snøfonn eller bre)

• Umerka rute

• Gangtid

• Spesielt fint utsiktspunkt

• Badeplass

• Fiskevatn

• Sjåverdig stad, attraksjon

• Geologisk attraksjon

• Fornminne

• Kulturminne

• Parkeringsplass ved turstartpunkt

• Informasjonstavle

Alle eller nokre av desse tema kan sjølvsagt takast med på eit turkart. I tillegg finst det ei meng andre tema som også kan takast med (og som heller ikkje er med i Norge 1 : 50 000-serien).

Valfri målestokk
Nokre område kan med fordel ha ein meir detaljert målestokk enn 1 : 50 000. Eit turkart kan gjerne lagast i 1 : 25 000 om det er ein meir passande målestokk. I nokre tilfelle er det ønskjeleg med mindre målestokk (som 1 : 60 000) for å få det aktuelle turområdet inn på eitt kartblad.

Oppdatert kart
Dei eldste kartblada i Norge 1 : 50 000-serien er 20 år gamle. Sjølv om landskapet stort sett er det same, kan det ha skjedd mykje med stiar, løyper og turtilbod i eit området sidan den tid. Nye namnevedtak kan også ha ført til endra skrivemåte for stadnamn. Produksjonstida på eit turkart kan vere nede i to - tre månader.

Informasjon om turområdet
Påbaksida av turkartet kan det trykkast informasjon om turområdet. Dette kan vere lokalhistorie, ruteskildringar, oversikt over hyttene i området, sal av fiskekort, osv. Slik informasjon finst ikkje på karta i Norge 1 : 50 000-serien.      TILBAKE TIL TURKART